"ბარსელონა” ჩემპიონთა ლიგის ნახევარფინალურ ეტაპზე მიუნხენის "ბაიერნთან” ორი მატჩის ჯამში ანგარიშით 0:7 განადგურდა, სწორედ ამიტომ, უკვე დაიწყო საუბრები ევროპის საკლუბო ფეხბურთში "ბარსელონას” ეპოქის დასასრულზე.

კატალონიური კლუბის ყოფილი ფეხბურთელი და მთავარი მწვრთნელი იოჰან კრუიფი ამას კატეგორიულად არ ეთანხმება.

"არა, არანაირი ეპოქის დასასრული. ეს უბრალოდ სისულელეა, – აცხადებს 66-წლის ჰოლანდიელი. – ეს ყველაფერი შეცდომების ბრალია, რომელიც კლუბის დირექტორებმა დაუშვეს. ასეთი რამ ხდება ხოლმე”.

იოჰან კრუიფმა 1990-იანი წლების დასაწყისში მთავარი მწვრთნელის რანგში "ბარსელონასთან” ერთად ზედიზედ ოთხჯერ ესპანეთის ჩემპიონატი და ჩემპიონთა თასი მოიგო.